ខេត្តសៀមរាប ៖ ក្រុមសារព័ត៌មានយើងបានចុះទៅដល់ទីតាំងជាក់ស្ដែងសង្កេតឃើញថា ពិតជាមានល្បែងស៊ីសងប្រភេទមាន់ជល់តាមទូរទស្សន៍អនឡាញដូចប្រជាពលរដ្ធបានរាយការណ៍ពិតប្រាកដមែន។
ល្បែងស៊ីសងជល់មាន់តាមអនឡាញកើតមានឡើងក្នុងសង្កាត់ទាំងបួន ទី១/សង្កាត់ស្វាយដង្គំ ទី២/សង្កាត់សាលាកំរើក ទី៣/សង្កាត់ស្លក្រាម ទី៤/សង្កាត់គោកចក បានកំពុងដំណើរការលេងហូរកញ្រៀវយ៉ាងសប្បាយរីករាយមិនឃើញមានសមត្ថកិច្ចណាហ៊ានចុះបង្រាបសោះឡើយ។
មូលហេតុនេះ!! ទើបប្រជាពលរដ្ឋរស់នៅទីតាំងខាងលើដាក់ការសង្ស័យថា អាជ្ញាធរ ជាពិសេស នគរបាលក្រុងសៀមរាប សង្ស័យបានទទួលសំណែនពីក្រុមមេល្បែងទាំងអស់នេះហើយមើលទៅ ទើបពុំសូវខ្វល់ខ្វាយ ពីផលប៉ះពាល់ដល់ប្រជាពលរដ្ឋទាល់តែសោះ។
ការបើកឱ្យលេងល្បែងស៊ីសងតាមអនឡាញនេះ ត្រូវបានគេមើលឃើញថា ជះឥទ្ធិពលអាក្រក់ដល់សង្គមយ៉ាងធ្ងន់ធ្ងរ ដោយពិនិត្យមើលឃើញពីផលប៉ះពាល់បែបនេះ ទើបថ្មីៗនេះប្រមុខរាជរដ្ឋាភិបាលកម្ពុជា បានដាក់ចេញនូវបទបញ្ជាយ៉ាងដាច់ណាត់ឱ្យមន្ត្រីថ្នាក់ក្រោមជាតិ អនុវត្តនិងបង្ក្រាបឱ្យខានតែបានដោយមិនយោគយល់ ចំពោះល្បែងស៊ីសងគ្រប់ប្រភេទ ពិសេស ផ្ដោតទៅលើល្បែងស៊ីសងតាមអនឡាញនេះតែម្ដង ដែលធ្វើឱ្យប៉ះពាល់ដល់សង្គម និងប្រជាពលរដ្ឋ ព្រោះថាតំបន់ដែលមានល្បែងស៊ីសងតែងតែកើតមាន នូវអំពើ និងបទល្មើសផ្សេងៗ ដូចជា ចោរលួច ចោរប្លន់ អំពើហិង្សាក្នុងគ្រួសារ ដោយសារឥទ្ធិពលនៃការញៀនល្បែង ធ្វើឱ្យប្រជាពលរដ្ឋមួយចំនួនលក់អស់ទ្រព្យសម្បត្តិ ដីធ្លី ព្រមទាំងជំពាក់បំណុលគេជុំទិស បង្កជាអសន្តិសុខក្នុងសង្គមជាដើម៕
ប្រជាពលរដ្ឋសូមស្នើឱ្យឯកឧត្តម ហួត សុធី ស្នងការនៃស្នងការដ្ឋាននគរបាលខេត្តសៀមរាប ជាពិសេសឯកឧត្តម ប្រាក់ សោភ័ណ អភិបាល នៃគណះអភិបាលខេត្តសៀមរាប សូមមេត្តាមានវិធានការទប់ស្កាត់ផងទាន ដើម្បីឱ្យស្របទៅតាមគោលនយោបាយភូមិ ឃុំ មានសុវត្ថិភាព ទាំង៧ចំណុច ដែលប្រមុខរាជរដ្ឋាភិបាល បានដាក់ចេញឱ្យអនុវត្តនាពេលកន្លងមកនេះ៕នៅមានត
